संघीय निजामती ऐनबारे मन्त्री मोदीले गरे ट्रेड युनियनका पदाधिकारीसँग छलफल

काठमाडौं । संघीय मामिला तथा सामान्य प्रशासनमन्त्री अमनलाल मोदीले संघीय निजामती ऐनको सन्दर्भमा राष्ट्रिय ट्रेड युनियनका पदाधिकारीसँग छलफल गरेका छन् ।

संसदको जारी अधिवेशनमा संघीय निजामती ऐनसम्बन्धी विधेयक संसदमा पेश गर्ने तयारी गरिरहेका मन्त्री अमनलाल मोदीले आज सिंहदरबास्थित मन्त्रत्रालयमा राष्ट्रिय ट्रेड युनियनका पदाधिकारीसँग छलफल गरेका हुन् ।
छलफलमा नेपाल राष्ट्रिय कर्मचारी संगठन, नेपाल निजामती कर्मचारी युनियन, नेपाल निजामती कर्मचारी संगठन, एकीकृत सरकारी कर्मचारी संगठन, नेपाल मधेसी कर्मचारी मञ्च लगायतका पदाधिकारीहरुको उपस्थिति थियो ।

ट्रेड युनियनका पदाधिकारीहरुले ऐन ल्याउँदा यसअघि उल्लेख भएका आफूहरुको अधिकारी कटौती नगर्न सुझाव दिए । त्यसका साथै कर्मचारीका हक हितलाई केन्द्रमा राखी समयसापेक्षताको आधारमा ऐन ल्याउनुपर्नेमा उनीहरुको सुझाव थियो ।

परामर्श लिने क्रममा मन्त्री मोदीले सबैको भावनालाई एकत्रित गरेर ऐन ल्याउने बताए । “सबैको भावना समेटेर हामी ऐन ल्याउँछौँ, सबैसँग राय लिने क्रममा छु, कर्मचारीहरुको हितलाई केन्द्रमा राखेर नै हामी ऐन ल्याउने दिशामा छौँ” उनले भने ।

मन्त्री मोदीले ऐनको सन्दर्भमा यसअघि पूर्वप्रधानमन्त्री, पूर्वमन्त्री, पूर्वसचिव लगायतसँग छलफल गरिसकेका छन् ।

मन्त्रालयले यस अघि तयार भएको मस्यौदालाई संघीयता कार्यान्वयनको अहिलेसम्मको अनुभव, विकसित नयाँ घटनाक्रम र नेपालको आवश्यकतालाई आधारमा मानेर परिमार्जनसहित ऐन ल्याउने गृहकार्य गरेको हो ।